काठमाडौँ । भौतिक पूर्वाधार तथा यातायातमन्त्री सुनील लम्साल ले निर्माणाधीन नागढुंगा–मुग्लिङ सडक आयोजनाको स्थलगत निरीक्षणका क्रममा दिएको अभिव्यक्तिले चर्चा र विवाद दुवै सिर्जना गरेको छ।
बिज्ञापन
आइतबार सडक आयोजनाको प्रगति अनुगमन गर्न पुगेका मन्त्री लम्सालले काममा ढिलासुस्ती भइरहेको भन्दै ठेकेदारप्रति असन्तुष्टि व्यक्त गरेका थिए। विशेषगरी सडक विस्तारका क्रममा अवरोध बनेका विद्युत् पोलहरू सार्ने कार्यमा भएको ढिलाइप्रति उनले कडा असन्तुष्टि जनाएका हुन्।
बिज्ञापन
अनुगमनका क्रममा धादिङका प्रमुख जिल्ला अधिकारी, सुरक्षा निकायका प्रमुख तथा आयोजनासँग सम्बन्धित अधिकारीहरूको उपस्थितिमा मन्त्री लम्सालले विद्युत् पोल व्यवस्थापनको जिम्मा लिएको ठेकेदार तत्काल खोजी गरी काममा लगाउन निर्देशन दिए। सोही क्रममा उनले “काम नगर्ने ठेकेदारलाई खोजेर ल्याउनुस्, आवश्यक परे खुट्टा भाँचेर भए पनि काम गराउनुस्” भन्ने आशयको अभिव्यक्ति दिएका थिए।
मन्त्रीको उक्त टिप्पणी सार्वजनिक भएसँगै सामाजिक सञ्जालदेखि प्रशासनिक वृत्तसम्म विभिन्न प्रतिक्रिया देखिन थालेका छन्। कतिपयले निर्माण व्यवसायी र ठेकेदारको लापरबाहीप्रति सरकार कडा रूपमा प्रस्तुत हुन खोजेको संकेतका रूपमा व्याख्या गरेका छन् भने केहीले सार्वजनिक पदमा रहेका व्यक्तिबाट कानुनी राज्यको सिद्धान्त विपरीत हुने खालका अभिव्यक्ति आउन नहुने टिप्पणी गरेका छन्।
बिज्ञापन
नागढुंगा–मुग्लिङ सडकखण्ड राजधानीलाई देशका विभिन्न भागसँग जोड्ने मुख्य राजमार्गको महत्वपूर्ण खण्ड मानिन्छ। लामो समयदेखि सडक विस्तार र स्तरोन्नतिको काम जारी रहे पनि विभिन्न प्राविधिक तथा प्रशासनिक कारणले आयोजना अपेक्षित गतिमा अघि बढ्न सकेको छैन। विशेषगरी विद्युत् पोल स्थानान्तरण, मुआब्जा वितरण तथा निर्माण सामग्री व्यवस्थापनका विषयमा पटक–पटक समस्या देखिँदै आएको छ।
स्थानीय बासिन्दाले सडक निर्माणमा भएको ढिलाइका कारण दैनिक सास्ती खेप्नुपरेको गुनासो गर्दै आएका छन्। धुलो, हिलो, जाम र दुर्घटनाको जोखिम बढेको भन्दै उनीहरूले आयोजना छिटो सम्पन्न गर्न सरकारसँग माग गर्दै आएका छन्।
यही सन्दर्भमा मन्त्री लम्सालले सम्बन्धित निकायहरूलाई आवश्यक समन्वय र सहजीकरण तत्काल गर्न निर्देशन दिएका थिए। उनले विद्युत् पोल हटाउने, निर्माण सामग्री आपूर्ति सहज बनाउने तथा बाँकी कामलाई तीव्र गतिमा अघि बढाउने विषयमा स्पष्ट कार्ययोजना बनाएर काम गर्न आग्रह गरेका छन्।
तर आयोजना अनुगमनका क्रममा प्रयोग गरिएको उनको भाषाशैली भने अहिले बहसको विषय बनेको छ। निर्माण कार्यमा भइरहेको ढिलाइप्रति सरकारको असन्तुष्टि प्रकट गर्ने क्रममा मन्त्रीले प्रयोग गरेको शब्द चयनले राजनीतिक तथा प्रशासनिक वृत्तमा थप चर्चा उत्पन्न गरेको छ।
